Mae Richard Evans, Manuel Alonso a Sarah Lawrence yn ymuno â'r Bwrdd ar adeg dyngedfennol i Chwaraeon Anabledd Cymru, gan ddod â mewnwelediad gwerthfawr ac ymrwymiad a rennir i gyfeirio strategaeth sy'n sicrhau bod chwaraeon a gweithgarwch corfforol yng Nghymru yn dod yn fwy cynhwysol, gyda mwy o fynediad i gyfleoedd.
Mae eu penodiadau'n adlewyrchu ffocws parhaus Chwaraeon Anabledd Cymru ar lywodraethu cryf, amrywiaeth mewn arbenigedd ac uchelgais glir i gefnogi chwaraeon cynhwysol o gyfranogiad lawr gwlad hyd i berfformiad elitaidd.
Dywedodd Gareth Thomas, Cadeirydd Chwaraeon Anabledd Cymru, “Mae Sarah, Richard a Manuel i gyd yn dod â phrofiad a mewnwelediad gwerthfawr nid yn unig, ond hefyd ddealltwriaeth wirioneddol o'r pŵer sydd gan chwaraeon cynhwysol i newid bywydau.
“Rydym yn edrych ymlaen at eu cyfraniad, eu persbectif a'u meddwl, a fydd yn helpu i barhau i yrru'r gwaith a wnawn ar y cyd yng Nghymru ymlaen.”
Sarah Lawrence
Mae Sarah yn dod ag arweinyddiaeth entrepreneuraidd, arbenigedd addysgol a phrofiad byw i Fwrdd Chwaraeon Anabledd Cymru, ochr yn ochr ag ymrwymiad hirhoedlog i gynhwysiant a mynediad. Yn entrepreneur Byddar a aned a'i magu yng Nghaerffili, sefydlodd Deaf Friendly Business Solutions yn 26 oed ar ôl profi gwahaniaethu yn gynnar yn ei gyrfa dylunio graffig. Yn ddiweddarach, cymhwysodd fel athrawes, dechreuodd gyflwyno hyfforddiant Iaith Arwyddion Prydain ac Ymwybyddiaeth o Fyddardod ledled Cymru, a hyfforddodd fel cyfieithydd Saesneg i Iaith Arwyddion Prydain, gan fynd ymlaen i gyfieithu Newyddion ITV am 10 mlynedd.
Yn 2020, gwnaeth Sarah hanes trwy berfformio Anthem Genedlaethol Cymru mewn Iaith Arwyddion Prydain ochr yn ochr â Syr Bryn Terfel ar ddiwedd yr eisteddfod genedlaethol. Wedi'i chyflwyno i golff gan ei thad, aeth ymlaen i gynrychioli ei gwlad mewn cystadlaethau Golff Byddar ledled y byd ac mae bellach yn edrych ymlaen at ddychwelyd i golff seniors.
Mae Sarah wedi ymestyn cangen addysgu Deaf Friendly i gynnwys darpariaeth Iaith Arwyddion Prydain fforddiadwy o ansawdd uchel, ochr yn ochr â'r hyfforddiant ymwybyddiaeth o Fyddardod y mae wedi'i gyflwyno'n rhyngwladol, gan gynnwys yn Qatar ac ar gyfer sefydliadau fel tîm Mercedes F1 a Llywodraeth Cymru. Dywed Sarah “Rwy'n ferch leol o Gymru, ond gyda unrhyw beth sy'n gysylltiedig â thegwch, cydraddoldeb neu fynediad, rwy’n ceisio gwneud gwahaniaeth”.
Richard Evans
Yn wreiddiol o Ferndale yng Nghymoedd y Rhondda, mae Richard wedi bod yn byw yn Llundain am y 25 mlynedd diwethaf, lle adeiladodd yrfa ryngwladol lwyddiannus ym maes cyllid.
Yn eiriolwr angerddol dros chwaraeon a chyfleoedd Cymru, mynychodd Richard Ysgol Millfield ar ysgoloriaeth chwaraeon a chynrychiolodd Cymru ar lefel ieuenctid mewn pêl-droed a chriced. Mae wedi ymrwymo'n ddwfn i'r effaith gadarnhaol y gall chwaraeon ei chael ar hyder, cynhwysiant a chyfleoedd bywyd. Mae ei gysylltiad â chwaraeon anabledd hefyd yn bersonol, ar ôl tyfu i fyny ochr yn ochr â'i frawd, sydd â pharlys yr ymennydd.
Dywedodd Richard: “Rwyf wrth fy modd ac yn teimlo'n anrhydeddus i ymuno â Chwaraeon Anabledd Cymru fel Ymddiriedolwr. Mae Chwaraeon Anabledd Cymru yn gwneud gwaith anhygoel ledled Cymru, o gynhwysiant ar lawr gwlad hyd at gefnogi athletwyr elitaidd ar lwyfan y byd. Rwy'n gyffrous i weithio ochr yn ochr â Bwrdd a thîm gweithredol mor wych ac i helpu i gefnogi twf ac effaith barhaus y sefydliad yn y blynyddoedd i ddod.”
Manuel Alonso
Mae gan Manuel fwy nag 20 mlynedd o brofiad mewn addysg uwch ac addysg bellach, gyda hanes cryf o lwyddiant mewn gwasanaethau myfyrwyr, strategaeth weithredol a newid sefydliadol.
Dechreuodd ei yrfa mewn gwasanaethau myfyrwyr, gan arwain arfer cynhwysol a chefnogaeth i fyfyrwyr anabl yng Ngholeg Loughborough. Rhwng 2009 a 2022, daliodd sawl rôl uwch ym Mhrifysgol Loughborough, gan gynnwys Dirprwy Brif Swyddog Gweithredu, cyn ymuno â Phrifysgol Brunel Llundain fel Prif Swyddog Gweithredu ym mis Tachwedd 2022.
Mae Manuel wedi ymrwymo i greu amgylcheddau cynhwysol a chyfartal sy'n galluogi pawb i lwyddo. Y tu allan i'r gwaith, mae'n frwdfrydig dros chwaraeon, yn enwedig beicio a rhedeg, ac mae'n gyffrous i ddod â'i angerdd personol a'i brofiad proffesiynol i gefnogi Chwaraeon Anabledd Cymru a'i genhadaeth ysbrydoledig.
